ក្រុមហ៊ុន Meta បានយល់ព្រមបង់ប្រាក់រហូតដល់ ១៦,៦៨ ពាន់លានដុល្លារអាមេរិក (ប្រមាណ ១២,២៦ ពាន់លានផោន) ទៅឱ្យបណ្តារដ្ឋជាច្រើននៅសហរដ្ឋអាមេរិក ដើម្បីដោះស្រាយ និងបញ្ចប់បណ្តឹងចោទប្រកាន់ដែលថា ថ្នាលបណ្តាញសង្គមរបស់ខ្លួនបានបង្កផលប៉ះពាល់ និងគ្រោះថ្នាក់ដល់កុមារ។
សវនាការជាប្រវត្តិសាស្ត្រដ៏ធំបំផុតមិនធ្លាប់មានពីមុនមកនេះ បានចោទប្រកាន់ Meta ថាបានដឹងច្បាស់ និងមានចេតនារៀបចំមុខងារ (Features) ផ្សេងៗដើម្បីទាក់ទាញកុមារឱ្យញៀននឹងបណ្តាញសង្គមរបស់ខ្លួន ដូចជា Facebook, Instagram និង WhatsApp។
យោងតាមឯកសារតុលាការ ក្រុមហ៊ុនបានបដិសេធរាល់ការប្រព្រឹត្តខុស ប៉ុន្តែបានយល់ព្រមលើកិច្ចព្រមព្រៀងបញ្ចប់វិវាទនេះ។ ទន្ទឹមនឹងការទូទាត់ប្រាក់ ក្រុមហ៊ុនក៏បានយល់ព្រមធ្វើការផ្លាស់ប្តូរធំៗនៅលើ Facebook និង Instagram រួមមាន៖ ការកំណត់កម្រិតនៃការប្រើប្រាស់ប្រចាំថ្ងៃ និងការរឹតបន្តឹងការប្រើប្រាស់នៅពេលយប់សម្រាប់កុមារ។ លើសពីនេះ ក្រុមហ៊ុនក៏នឹងបង្កើនវិធានការការពារកុំឱ្យកុមារចូលមើលមាតិកាដែលកំណត់អាយុផងដែរ។
កិច្ចព្រមព្រៀងនេះជួយដោះស្រាយបណ្តឹងដែលប្តឹងដោយរដ្ឋចំនួន ២៩ នៅសហរដ្ឋអាមេរិក និងបញ្ចប់សវនាការរបស់តុលាការសហព័ន្ធ ដែលជាការសាកល្បងដ៏ធំបំផុតមួយប្រឆាំងនឹងការចោទប្រកាន់ថា ក្រុមហ៊ុនបណ្តាញសង្គមបានបង្កផលប៉ះពាល់ដល់អ្នកប្រើប្រាស់វ័យក្មេង។
កិច្ចព្រមព្រៀងនាថ្ងៃពុធនេះ ក៏បានដោះស្រាយបណ្តឹងផ្លូវច្បាប់ពីរដ្ឋ California, Illinois, New Mexico និង Washington DC ពាក់ព័ន្ធនឹងបញ្ហាឯកជនភាពក្នុងរឿងអាស្រូវ Cambridge Analytica ដែលកាលនោះក្រុមហ៊ុនប្រឹក្សាយោបល់មួយនេះបានលួចប្រមូលទិន្នន័យផ្ទាល់ខ្លួនរបស់អ្នកប្រើប្រាស់ Facebook រាប់លាននាក់ផងដែរ។
